طريقة المش فى البيت ولا اطعم

المقادير والطريقة

2 كيلو جبن قريش(فلاحى) و حطيهم فى مصفى و رشى عليهم3 ملعقه كبار ملح و نص ملعقة شطة و سيبيهم حوالى 48 ساعة فى التلاجة تصفى المية
(الطريقة دى فى حاله لو عايزاها قطع الجبنة)
انا لو عايزاها زى الكريمة كدا يبقى نستغنى عن خطوة التصفية و نحطها على طول فى البرطمان بملحها و الشطة
و نجيب مية الجبنة القديمة من عند اى حد من اللى بيبعوها(اللى هيا المش)
و اوعى تحطى المية دى من غير ما تصفيها عشان سعات بيبقى فيها دود رفيع
و لو عندك مورتة حطيها معاهم فى البرطمان
(ممكن من غير بس الطعم بالمورتة بيبقى واااو)
حطى كلوا على بعضوا فى البرطمان و سيبيها اقل حاجة من 4ل 6 شهور
و هيبقى عندك انضف جبنة قديمة دوقتيها فى حياتك و طبعا كل ما تخلص تزودى على المش جبنة قريش و ملح و شطة و تسيبيهم بردة
ملحوظة:
لازم تحطى كام قرن فلفل حامى معاهم شقيه شق رفيع خالص و حطيه
وياريت طبعا تضعى الجبنة الرومى الناشفة والشيدر والجبنة النستو
عن تجربة والله فوق الروعة واى حاجة زايدة عندك من الجبن والفلفل
وبالف هنا وشفا
ولا تنسونى فى الدعوات