بقى المصرى تايهه فى بيته وأرضه

---

يعيش الرئس حتى لو عاش لوحده
يعيش الرئيس اللى وفى بعهده
يعيش اللى عيشنا أحلاها عيشه
بنأكل ونشرب ونلبس فى عهده ..

يعيش اللى حول بلدنا للوكانده
جناب الزعيم الكبير الكوماندا
كلامه أوامر وعارض يا كافر
وموتوا بغيظكم يا أهل المعارضه ..

يعيش اللى حول بلدنا لغابه
يعيش اللى تاجر بدم الغلابه
وقال إنتخبنى حأجيب حق إبنى
ولا شفنا حاجه وأسفين يا شهدا ..

يعيش اللى علمنا معنى السياسه
وخطط وهندس ودرس فى ناسا
وكمل مسيرته فى أهله وعشيرته
وإيه يعنى نولع فداكى يا نهضه ..

يعيش اللى قسم بلدنا بعنده
مسيحى ومسلم ومش فارقه عنده
بحراوى وصعيدى وده بورسعيدى
بقى المصرى تايهه فى بيته وأرضه ..

يعيش الرئيس حتى لو عاش لوحده
يعيش الرئيس اللى وفى بوعده
يعيش اللى عيشنا أحلاها عيشه
بنأكل ونشرب ونلبس فى عهده ..